Facal no dhà bho Chadalach

Post-d bho Aran / A bheil cù agad?

2007-04-03T21:12:00.000+01:00

Fhuair mi post-d bho Aran an diugh agus tha e ag iarraidh beagan cuideachaidh bhuainn. (Às aonais cha bhiodh TnamB beò an diugh.) Dh'innis a bhean dha gum bi iad a' faighinn cù eile a dh'aithghearr agus mar sin bidh iad ag iarraidh ainm air a shon. Bu mhath leotha ainm Gàidhlig ach chan eil iad airson ainm mar Donnchadh no Eilidh no rudeigin mar sin a chur air -- b' fheàrr leotha rudeigin a tha nas traidiseanta airson con. Thug mi moladh no dhà dhaibh ach dè ur beachdan, a chàirdean?

Sgrìobhaibh ur beachdan an seo agus cuiridh mi gu Aran iad. Mòran taing :-)

Cuairt nam Blog

2007-03-01T17:35:00.000Z

Bidh am prògram a rinn BBC Alba air na blogaichean Gàidhlig air an TBh a-nochd: 18:30 air BBC2.

Botal-teth no botal-fuar?

2006-07-25T22:16:00.000+01:00

Bha mi a' bruidhinn ri banacaraid, Iona, air an fhòn a-raoir agus bha mi a' gearain air sgàth 's gu bheil an aimsir fada ro theth dhomhsa an dràsda. Dh'aontaich i leam agus an uairsin dh'innis i sgeulachd dhomh. O chionn greis bha Iona anns an ospadal agus fhad 's a bha i a' feitheamh ris an dotair chuala i cailleach a' bruidhinn ri nurs. Seo an còmhradh a bha ann eadar an dithis aca, mar a dh'innis Iona e dhomh.

"Och, tha i fada ro theth air an oidhche an dràsda, chan urrainn dhomh cadail gu furasda," ars a' chailleach. "'S bochd sin," fhreagair an nurs, "a bheil botail-fhuar' agaibh?"

"Botal-fuar?"

"Seadh, botal-fuar!"

"Tha fhios a'm dè th'ann am botal-teth, ach dè th'ann am botal-fuar?" dh'fhaighnich a' chailleach.

"Uill," ars an nurs, "faighibh dà no trì botail phlastaig -- bhiodh botail-bhainne, dà liotair, math -- agus anns a' mhadainn, lìonaibh iad le uisge, mu 1.5 liotair, agus cuiribh iad san reòdhadair. Nis, nuair a thèid sibh dhan leabaidh, cuiribh aon air gach taobh dhiubh agus am fear eile faisg air ur casan. Bidh sibh nur cadal mar leanabh a-rithist!"

Abair deagh smaoin!

B dhen Bhrag

2006-06-20T18:44:00.000+01:00

Fhuair mi camara ùr an diugh 's thog mi an dealbh seo nuair a bha mi a' tighinn dhachaigh uair no dhà air ais. Bha an t-uisge ann aig an àm 's mar sin chan eil an dealbh uabhasach math, ach tha fhios agam a-nis gu bheil an camara ag obrachadh...

San dealbh is urrainn dhuibh am B of the Bang fhaicinn. 'S e deilbheadh mór a th'ann a tha na sheasamh aig an lann-cluiche far am bi Manchester City a' cluich ball-coise. An toigh leibh e? Nam bheachdsa tha e gu math inntinneach agus is toigh leam e.

Ball-coise

2006-05-05T19:53:00.000+01:00

An toigh leibh ball-coise? Chan eil mi cho déidheil air -- 's fheàrr leam criogaid -- ach tha Cupa na Cruinne air fàire 's bidh a h-uile duine a' bruidhinn air a dh'aithghearr.

Co-dhiù, fhuair mi post-d bho charaid an diugh. Thuirt e "Tha fhios a'm nach toigh leat ball-coise, ach 's toigh leat StickCricket, mar sin, 's dòcha gum bidh seo a' còrdadh riut cuideachd". Uill, chluich mi geama no dà fhichead agus chan eil e dona idir :-) Ach dhomhsa, tha e gu math doirbh -- chan eil mi air barrachd air fichead puing 's a h-ochd a chur ri chéile fhathast. Feuchaidh mi a-rithist nas anmoiche...

Co-là-breith sona!

2006-04-26T00:42:00.000+01:00

Tha am blog seo aon bhliadhna a dh'aois an diugh :-)

Tha e doirbh a chreidsinn gu bheil mi air a bhith a' blogachadh sa' Ghàidhlig fad bliadhna ach 's e deagh spòrs a bh'ann. Tha mi cinnteach gum bi spòrs gu leòr ann san àm ri teachd cuideachd 's tha mi an dòchas gum bi mi fhathast a' sgrìobhadh an seo sna bliadhnaichean a tha romhainn.

Tuilleadh a' tighinn a dh'aithghearr... :-)

An t-seann dùthaich

2006-03-20T17:36:00.000Z

Fhuair mi post-d bhon amadan ud aig ScrewGaelic.org latha no dhà air ais, 's thuirt e rudeigin mar "Tapadh leibh airson na taic' a tha thu fhathast a' toirt dhuinn. Ma tha thu airson ceangal a chur air an làraich agad, seo an HTML..." An d'fhuair duine sam bith eile am post-d seo? Smaoinich mi gun robh e gu math éibhinn.

An déidh dhomh am post-d fhaighinn, bha mi airson faighinn a-mach ma bha dad sam bith air tachairt san t-seann dùthaich 's mar sin chaidh mi air ais. Uill, tha am fòrum dùinte fhathast 's tha sanasachd gu leòr ann airson poker agus casinos, ach, mar a bha mi a' smaoineachadh, cha bhi dad sam bith inntinneach a' tachairt an siud (quelle surprise!). Ach, fhad 's a bha mi ann, chunnaic mi nach robh na ceanglaichean chun nam blogaichean againn ann a-nis! Smaoinich mi gun robh sin gu math éibhinn cuideachd -- Thoir taic dhuinn ach thalla is cac dhut fhéin!

Saoilidh mi nach eil na $6000 aige fhathast nas motha -- 's fìor bhochd sin. Hehehehe ;-)

Lorg mi Tìr eile

2006-03-16T18:13:00.000Z

Fastyr mie!

Fhad 's a bha mi air an eadar-lìon Diluain, lorg mi dà bhlog eile nach eil mi air faicinn roimhe. Chan e blogaichean Gàidhlig ach blogaichean Gàidhlig Mhanainneach a th'annta! Tha a' chiad bhlog ri fhaighinn aig BlogVrian agus 's e Brian Stowell an t-ùghdar. 'S dòcha gu bheil sibh eòlach air mar-thà a chionn 's gu bheil e glé chudthromach ann an eachdraidh na Gàidhlig Manainnich. Tha am blog eile ri fhaicinn aig Blog ny Gaelgey ach chan eil mi eòlach air an ùghdar.

Tha na dà bhlog gu math inntinneach, ach chan urrainn dhomh ach facal no dhà a thuigsinn an siud 's an seo orra air sgàth 's gu bheil litreachadh na Gàidhlig Manainnich gu math neònach dhomhsa. (Gu cinnteach chan eil e cho math ri litreachadh na Gàidhlig... uill, nam bheachdsa co-dhiù.) Ach feumaidh mi ràdh gu bheil e cho math a bhith a' faicinn blogaichean sa' Ghàidhlig Mhanainneach san 21mh linn. :-)

Blog ùr bho Inbhir Narann

2006-03-03T00:24:00.000Z

Fhuair mi post-d aig Tìr nam Blòg HQ a-nochd bho bhlogair eile ann an Inbhir Narann. Abair àite! Co-dhiù, carson nach téid sibh gu http://fuaim-lorg.blogspot.com/ agus cuir fàilte oirre? :-)

Boireannach craicte

2006-02-26T22:28:00.000Z

Uair no dhà air ais fhuair mi teacsa (text message, mar a chanas iad) bho bhoireannach craicte. Thuirt i, Hai, tha mi duilich nach do chuir mi freagairt thugad gu ruige seo, ach tha am fòn agam briste 's mar sin tha mi aig an àireamh seo an dràsda! Ciamar a tha sibh uile? Bha mi a' bruidhinn ri Gary an dràsda 's thuirt e gum bu chòir dhuinn tighinn air chéilidh oirbh! Dé mu dheidhinn oidhche h-Aoine? Tìoraidh, Lynsey.

Nis, chan aithne dhomh i, ach smaoinich mi gum bu chòir dhomh a bhith cuideachail, 's mar sin chuir mi freagairt thuice. Thuirt mi, Saoilidh mi gun do chuir thu an àireamh cheàrr san fhòn agad, chan eil mi eòlach air Lynsey sam bith. Tha mi duilich.

Mu leth-uair an déidh sin, fhuair mi teachdaireachd eile bhuaipe... Thuirt i, Thà thusa eòlach orm! Ciamar a tha Lenord (sic) beag?

Uill, chan eil càil a dh'fhios agam dé bu chòir dhomh dèanamh a-nis! 'S dòcha nach dèan mi dad sam bith eile, ach tha eagal orm gum bi am boireannach craicte seo agus "Gary" a' feitheamh rium aig an taigh agam Dihaoine...

Clàr ùr

2006-02-26T19:55:00.000Z

Feasgar math a h-uile duine. Chunnaic mi an diugh nach do sgrìobh mi dad sam bith air a' bhlog am mìos, ach uill, sin mar a tha e bho àm gu àm.

Co-dhiù, bha mi a' cluich le Google an diugh agus lorg mi làrach air an robh beagan mu dheidhinn Last.fm 's Audioscrobbler. Bha fios agam air o chionn fhada, ach cha d'rinn mi càil leis gu ruige seo. 'S e uidheam airson clàrachadh a' chiùil ris a tha thu ag éisdeachd a th'innte agus, nam bheachdsa, bidh seo gu math inntinneach dhomhsa. (Tha 6000+ mp3s ann air an laptop agam.) Chan eil mi cinnteach ma bhios na toraidhean inntinneach do dhuine sam bith eile, ach chì sinn. 'S dòcha gum bi ùidh aig feadhainn dhiubh agus, ma bhios thu ag éisdeachd ri ceòl air a' choimpiutair agad gu tric, 's dòcha gum bi thu airson beagan audioscrobladh a dhèanamh cuideachd? :-)

(Bidh an clàr ri fhaicinn anns an sidebar a dh'aithghearr.)

@ Taibhse...

2006-01-28T09:47:00.000Z

Tha sinn ann aig an làraich seo a-nis. Tha mi an dòchas gum faic sinn a dh'aithghearr thu. :-)

Dh'fhàg mi SG...

2006-01-25T20:05:00.000Z

Feasgar math a h-uile duine. 'S dòcha gu bheil fios agaibh mar thà gun do dh'fhàg mi an làrach SG (SaveGaelic.org) an diugh. Leugh mi sa' mhadainn an diugh gun robh e ri reic 's cha toigh leam an rathad a tha e a' gabhail na làithean seo nas motha. Thug mi taic 's cuideachadh do luchd-ionnsachaidh eile fhad 's a bha mi nam bhall oir tha mi den bheachd gu bheil e cho cudthromach a bhith ag àrdachadh na Gàidhlig. Ach a-nis tha mi cinnteach nach eil an t-amadan ud airson an aon rud. Tha esan ann airson airgid a-mhàin 's mar sin dh'fhàg mi.

Mar sin, am feasgar seo, bha mi a' smaoineachadh mu dheidhinn làraich ùire. Bòrd-brath ùr. Chan eil mi cinnteach ma tha mi ag iarraidh rudeigin mar SG a-rithist. Bha cus ann sa' Bheurla agus cha bhiodh móran dhaoine a' tighinn gu SG ach turas no dhà 's an déidh sin rachadh iad air falbh... Ach am faca sibh maes-e.com? 'S e bòrd-brath a th'ann ach tha a h-uile rud sa' Chuimris. Dé mu dheidhinn a leithid, ach sa' Ghàidhlig? Aon-chànanach -- Tìr na Cabadaich? Nì mi e, ma tha ùidh agaibh -- dé ur beachdan? Am biodh e feumail? Chan eil dad sam bith ann mar sin an dràsda.

Tha blogachadh math gu dearbh, ach saoilidh mi gu bheil bùird-brath 's blogaichean gu math diofaraichte, bho àm gu àm bhiodh e feumail nam b'urrainn dhuinn cuideachadh fhaiginn bho chàch a chéile ann an Tìr nam Blòg...

Mar a thuirt mi, dé ur beachdan?

A bheil Spàinnis agaibh?

2006-01-24T07:43:00.000Z

Uill, mura bheil Spàinnis agaibh mar thà, carson nach téid sibh gu SG gun dàil? Nuair a bha mi ann o chionn mionaid no dhà, chunnaic mi sanasachd ùr airson ionnsachadh na Spàinnis! Tha mi cinnteach gu bheil a' mhuinntir aig an sgoil "don Quijote" math, ach tha rudeigin ann nach urrainn dhomhsa tuigsinn -- dé mu dheidhinn na Gàidhlig? Carson a tha sanasachd ann airson don Quijote, ach chan eil dad sam bith ann airson an t-Sabhail Mhóir no àiteachan eile far a bheil iad a' teasgasg na Gàidhlig? SG -- beò airson àrdachadh na Spàinnis...?

Blog ùr!

2006-01-20T20:12:00.000Z

Chunnaic mi blog ùr an dràsda 's tha Còmhradh air mar ainm. Saoilidh mi gum bi e inntinneach dhuibh uile. Fàilte gu Tìr nam Blòg! :-)

Sanasachd airson TnamB

2006-01-07T19:55:00.000Z

Seo sgeulachd bheag dhuibh. Nuair a chuir sinn TnamB air bhog san Dùbhlachd an uiridh, chuir Graisg 's mi fios gu móran dhaoine mu a deidhinn. Chuir sinn post-d gu Comunn na Gàidhlig, Sabhal Mór, sgioba Gaelcast 's msaa. Thuirt a' mhórchuid gur e deagh smaoin a bh'ann 's bhiodh iad deònach beagan taic a thoirt dhuinn leis an t-sanasachd (Móran taing!). Bha mise glé shona 's bha e coltach gun robh daoine eile sona cuideachd.

Bha a h-uile rud a' dol gu math ach an uair sin fhuair mi freagairt bhon mhaighstir-lìn aig SG. Bha mi air sgrìobhadh thuige le earrann bheag sa' Ghàidhlig 's bha mi an dòchas gun cuireadh e air an làraich SG i -- anns an roinn de naidheachd air an duilleig dhachaigh. Bha mi an dòchas gun cuireadh e ceangal gu TnamB ann cuideachd. Gu dearbh tha SG ann airson "àrdachadh na Gàidhlig", nach eil? Fhuair mi an fhreagairt seo (sa' Bheurla)... "Tha sinn a' cruinneachadh blogaichean cuideachd, ach tha sinn airson daoine a bhith nam buill nam fora mus cuir sinn na blogaichean aca air an liosta".

Liosta?

Uill, tha mi an dòchas gum bi sibhse ag aontachadh leam, ach nam bheachdsa chan e ach liost' a rinn Aran 's mise! Nuair a leugh mi an fhreagairt bhuaithe bha an fhearg orm, ach cha tuirt mi dad gu ruige seo. Cha robh mi ag iarraidh sabaid no argumaid ('s chan eil mi gan iarraidh a-nis) ach cha do thuig mi a fhreagairt idir. "Àrdachadh na Gàidhlig"? Gu cinnteach tha daoine ann air na fora aig SG a bhios ag àrdachadh na Gàidhlig gach latha ach a-nis chan urrainn dhomh ràdh le cinnt gu bheil esan nar measg. Chì sinn dé tha dol san àm ri teachd, ach cha bhith mise a' ceannach léintean-T no sgudal eile bhuaithe.

Anns an dol seachad, tha TnamB a' faighinn mu 100 "hits" gach lath an dràsda. :-) Dé mu dheidhinn bathair airson TnamB? A bheil ùidh aig duine sam bith?

Faclan gliocais...

2006-01-04T19:57:00.000Z

Fhuair mi post-d an diugh bho charaid, Ed, a tha a' fuireach ann an Oxford na làithean seo. 'S ann às a' Chuimrigh a tha e, ach mu shia bliadhnaichean air ais bha sinn a' fuireach le chéile ann am Manchester.

Co-dhiù, thuirt e dhomh gun robh e aig pàirtidh Oidhche Challainn (ris an deoch gu ceithir uairean sa' mhadainn) agus nuair a bha e ann, bha iad a' cluich Pictionary. Chluich mi fhìn Pictionary bliadhna no dhà air ais ach cha robh mi math air idir. Bha agam ri "Texas" a dhèanamh, 's mar sin, peann nam làimh, dhealbhaich mi an iomall 's chuir mi rionnag ann cuideachd. ('S e an "One Star State" a th'ann, nach e?) Uill, bu chòir dhomh ràdh gun robh mi air pinnt no ceithir a ghabhail ach cha robh an dealbh uabhasach dona. Dé thuirt na daoine san sgiob' agam? Cha tuirt iad dad sam bith. Uill, thuirt iad "eh?" no "gun fheum!" no "dé tha thu a' dèanamh?" no rudan eile mar sin ach 's e cùis chaillte a bh'innte...

A-nis, nuair a bha Ed a' cluich Pictionary, tha e coltach nach robh esan math air na bu mhotha. Ach thuirt e na faclan glice seo dhomh an diugh -- nuair a bhios thu a' cluich Pictionary san àm ri teachd, bi faiceallach leis na cairtean a bhios tu a' taghadh. Eadhon ma bhios na dealbhan a bhios tu a' dealbhachadh uabhasach fhéin math, ma thaghas tu a' chairt cheàrr cha bhi an sgiob' agad feumail dhut idir -- cha chan iad dad. Dé na cairtean a bha esan air taghadh? "Yam" agus "Lazy susan". Feumaidh mi ràdh gu bheil mi ag aontachadh leis.

Bliadhna mhath ùr!

2006-01-01T00:01:00.001Z

Tha mi an dòchas gum bi spòrs gu leòr agaibh uile ann an 2006 :-)

Nollaig chridheil!

2005-12-25T01:31:00.000Z

Chan eil móran agam ri ràdh, ach tha mi an dòchas gum bi latha foiseil sona agaibh uile an diugh. :-)

Eachdraidh TìrnamBlòg

2005-12-20T20:53:00.000Z

Seo beagan eachdraidh an làraiche TìrnamBlòg...

Anns an t-Samhain 2005, chuir duine às a' Chuimrigh -- Rhys Wynne (Gwenu dan Fysiau) -- teachdaireachd air a' bhlog seo. Thuirt e gum bu chòir dhomh làrach ùr a thòiseachadh. Làrach a bhiodh mar chridhe saoghal nam blogaichean. Smaoinich mi gun robh e ceart -- tha saoghal nam blogaichean gu math eadar-nàiseanta agus bha mi air chluinntinn gun robh e doirbh do dhaoine a bhith a' tadhal air gach blog.

Thuirt Rhys cuideachd gum bu chòir dhomh sgrìobhadh gu Aran Jones (Blogiadur) air sgàth 's gun robh e air làraich airson nam blogaichean Cuimris a thogail. Sgrìobh mi gu Aran 's thuirt e "Seadh, deagh smaoin gu dearbh. Rinn mi Blogiadur, am faca tu e? Am faod mi cuideachadh leis an làraich ùir?" (Uill, thuirt e rudeigin mar sin, chan e Gàidhlig ach Cuimris a th'aige.) Bhruidhinn sinn ri chéile mu dheidhinn a' phròiseict seo agus, an déidh seachdaine no dhà, thog Aran tùs-samhail air ar son. Chuir mi Gàidhlig air agus dh'atharraich mi mion-chùnntas an siud 's an seo, ach rinn Aran a' mhòrchuid den obair. Abair duine! Bu mhath leamsa mo thaing a thoirt do Aran, às a aonais cha bhiodh an làrach ud beò an diugh agus tha sinn uile fada na chomain.

Tha mi an dòchas gum bi TìrnamBlòg a' còrdadh riut, agus gum bi sinn a' toirt brosnachadh do dhaoine eile a bhith a' blogachadh sa' Ghàidhlig a dh'aithghearr. Ma tha Gàidhlig agad agus rudeigin ri ràdh, carson nach tòisich blog Gàidhlig agus aonaich leinn?

Ma bhios sinn fortanach, bidh Tìr nam Blòg a' fàs gu luath ann an 2006 agus bidh an làrach ud ann mar àite-coinneimh cuideachd.

Chaidh TìrnamBlòg a bhunaich air an 17mh latha den Dùbhlachd 2005 agus tha mi an dòchas gum bi e ann airson móran bliadhnaichean ri tighinn.

Fàilte gu TìrnamBlòg!

2005-12-17T01:48:00.000Z

Uill, chunnaic mi rudeigin ùr an diugh air an eadar-lìon a tha, nam bheachdsa, air leth sgoinneil. 'S e àite-coinneimh de saoghal nam blogaichean a th'ann -- seòrsa de phaipear-naidheachd no iris a bhios a' cur na h-uile blog ann an aon àite! Carson nach téid sibh gu TìrnamBlòg nuair a bhios mionaid no dhà agaibh? Tha mi cinnteach gum bi e inntinneach dhuibh a-nis agus san àm ri teachd nuair a tha e air fàs nas motha. Aonaichibh leinn! :-)

Ceòl ùr le Einstürzende Neubauten

2005-12-14T19:30:00.000Z

Fhuair mi móran ciùil ùir le Einstürzende Neubauten o chionn ghoirid. 'S e còmhlan-ciùil às a' Ghearmailt a th'ann an EN agus 's toigh leam an ceòl gu mór. Thàinig an CD ùr 's DVD, Grundstück Disathairne agus luchdaich-a-nuas mi na mp3s ùra bho Mhusterhaus -- am pròiseact eile aca -- Diluain. Chan urrainn dhuibh an ceòl seo a cheannach sna bùthan, gu dearbh, chan urrainn dhuibh a cheannach idir a-nis. Mìnichidh mi...

Ann an 2004 thòisich EN pròiseact ùr -- Ìre 2 -- air an eadar-lìn. (Bha Ìre 1 ann, saoilidh mi, bho 2003 gu 2004 ach cha robh fios agam mu a deidhinn gus an robh i air crìochnachadh.) Co-dhiù, obraich am pròiseact mar seo... Chuir luchd-taic airgead (€30 airson an CD no €40 airson an DVD) dìreach chun a' chomhlain agus, aig crìoch a' phròiseict, fhuair iad an ceòl ùr. Cha robh companaidh-clàrachaidh an lùib idir -- bha am pròiseact eadar na luchd-taic agus EN a-mhàin. Fhad 's bha Ìre 2 ann, rinn EN webcasts agus stuth eile mar sin. B'urrainn dhuinn am faicinn nuair a bha iad ag obair san stiùideo agus uaireannan bha rudan eile ri fhaighinn bhuapa. Mar eisimpleir, fhuair sinn mp3s (dà uair a thìde) bho chuirm-chiùil a thachair ann am Prague ann am meadhon a' phròiseict ann an 2004. Abair pròiseact a bh'ann agus, mu dheireadh thall, tha an CD 's DVD agam a-nis. :-)

Choimhead mi an DVD feasgar Sathairne 's bha e glé ùidheil. 'S e cuirm-chiùil a bh'ann air an DVD a thachair ann am Palast der Republik ann am Berlin. Mura bheil fios agaibh cheana (am faca tu sin a Ghraisg -- nach math a rinn mi!) 's e an togalach Riaghaltas den Ghearmailt-an-Ear a bh'ann am Palast der Republik -- uill, nuair a bha a' Ghearmailt-an-Ear agus a' Ghearmailt-an-Iar dealaichte co-dhiù.

'S e ceòl neo-àbhaisteach a bhios EN a' cluich. Bidh iad a' dèanamh móran le pìosan meatailte, gaotharan, pìoban, springean 's "fuaimean lorgte" eile (còmhla ri giotàran 's ionnstramaidean nas àbhaisteach eile). Ma tha ùidh agaibh, tha taghadh ciùil ri fhaighinn air an làraich aca.

A-nis, mu dheidhinn Musterhaus. Dìreach mar a bha e airson Grundstück, bha aig daoine ri chur airgead gu EN tron eadar-lìn agus bha dà roghainn ann -- CDs no mp3s. Thaghadh mi na mp3s a-mhàin oir cha robh mi cinnteach gum biodh am pròiseact math. Le Musterhaus bhiodh EN a' dèanamh "ceòl" glé neònach. Mar eisimpleir, airson an dàrna chlàir Unglaublicher Lärm chuir EN móran ghlaodhairean ann an seòmar beag beag 's chluich iad leis na fuaimean...

Anns na mp3s a fhuair mi Diluain, chluich EN a h-uile "port" air an aon ionnstramaid -- am Bassfeder! ("Bass spring" sa' Bheurla, ach chan eil fios agam idir dé an t-ainm a bhiodh air sa' Ghàidhlig!) Uill, nuair a chuala mi nach do chleachd EN dad ach am BassFeder, bha an t-eagal orm nach biodh ach sgudal sna mp3s. Ach abair iongnach a bh'orm nuair a bha mi ag éisdeachd ris na mp3s! Bha na puirt gu math binn!

Co-dhiù, nam bheachsa, tha an ceòl a bhios EN a' dèanamh glé inntinneach agus, 's dòcha, gum biodh e a' còrdadh ribh cuideachd. Carson nach éisd ri beagan den cheòl aca air an làraich ud?

Àm na Nollaig

2005-12-04T16:04:00.000Z

Àm na Nollaig
Tha Crìosd beò a rithist
ann a Woolworths.

"A bheil rùm anns an taigh-òsda?"
Chan eil gu dearbh --
tha iad a' dèanamh Bed and Breakfast.

Chan eil fhios aig an aiseal
air Crìosd no air Crìosdachd --
tha a cheann anns a' phrais.

Sgrìobh Hèrod òrdugh
ann an rùm dubh-dhorch --
"cuiribh ás do na rionnagan."

Bha sùilean an leinibh
a' coimhead a mhàthar
le iongnadh.

Na cìobairean air a' bheinn
cìobairean Leódhais --
eildearan na h-ath-linne.

Chuir Moire an saoghal
gu ciùin air a h-uchd --
nach E a bha meata.

Dh'fhosgail an Diabhal
cairt na Nollaig --
A Nèamh fhéin!

Dannsairean, dannsairean,
na rionnagan air an talamh
a' leum 's a' leum.

Anns an dealbh
Moire 's a Mac --
le Da Vinci no Rubens.

"'S e an leanabh mo nàmhaid,"
arsa Hèrod gu mall --
"tha an leanabh neo-thuigseach."

"Nuair nach còrd sgialachd ri leanabh,"
arsa Hèrod gu mall,
"innsidh e dhut e."

"Nuair a dh'fhàsas E suas,"
arsa Moire le pian,
"fàgaidh e mi."

"Nuair a dh'fhàsas E suas,"
arsa Moire le pian,
"Théid e dhachaigh."

Sheas na h-ainglean aig an dorus.
Leis an t-solus a thug E dhaibh
thug iad bho mhàthair E.

Uill, 's e Aidmheint a th'innte an dràsda 's mar sin bha mi a' smaoineachadh gum biodh dàn eile le Iain Mac a' Ghobhainn a' còrdadh ribh. Saoilidh mi gur e dàn neònach a th'ann, ach chòrd an t-ochdamh rann rium gu mór -- Dòmhnall Dubh le cairt na Nollaig... hehehe :-)

Uilebheist!

2005-11-16T16:36:00.000Z

Uilebhiasd
ag éirigh ás a' chuan
"An gabh thu copan tea?"

Bha mi a' leughadh beagan bàrdachd bhon leabhar Eadar fealla-dhà is Glaschu le Iain Mac a' Ghobainn a-raoir. Tha na loidhnichean seo bhon dàn Sgialachdan Gàidhlig 's chòrd iad rium gu mór. Tha móran deagh dhàn san leabhar 's mholainn gu dearbh e. Cuiridh mi aon no dhà de na dàin eile an seo am mìos no an ath-mhìos. Tha aon ann mu dheidhinn Nollaige as toigh leamsa cuideachd, ach chan e an Dùbhlachd fhathast 's mar sin tha agaibh ri feitheamh seachdain no dhà. ;-)

Ainm ùr agus sanasachd

2005-11-11T19:16:00.001Z

Dh'atharraich mi ainm a' bhluig seo an diugh. Nuair a sgrìobh mi "faclan gliocais" sa' Ghiblean, chan e ach fealla-dhà a bh'ann. Aig an àm ud bha tiotal a dhìth orm 's thàinig "faclan gliocais" gu m'inntinn. Bha fios agam gu dearbh nach bi faclan gliocais ann idir an seo! Mar sin, bidh am blog seo a' dol leis an ainm "Facal no dhà bho Chadalach" a-nis. 'S e tiotal nas fheàrr a th'ann, nach e?

Co-dhiù, tha beagan deasbaid ann mu dheidhinn sanasachd airson saoghalan nam blogaichean ceilteach. Thoiribh ur beachdan (sa' Ghàidhlig no sa' Bheurla no sa' chainnt eile) an seo.

Podcastan sa' Chuimris

2005-11-06T20:07:00.000Z

Sgrìobh Rhys thugam latha no dhà air ais mu dheidhinn phodcastan sa' Chuimris. Chan eil Cuimris agamsa idir 's mar sin cha bhi mi gan tuigsinn, ach 's dòcha gun urrainn do chuideigin a tha a' leaughadh iad a thuigsinn. Chuir Rhys na ceanglaichean an seo.

Lemmy air drogaichean...

2005-11-02T14:51:00.000Z

Chunnaic mi an dràsda gum bi Lemmy bho Mhotörhead a' labhairt mu dheidhinn drogaichean sa' Chuimrigh a-màireach! Bidh e a' bruidhinn aig Seanadh Nàiseanta na Cuimrigh ann an Caerdydd. Ma tha ùidh agaibh, tha tuilleadh an seo bhon BhBC.

Bidh Lemmy 's an còmhlan aige a' cluich ann am Manchester Disathairne, ach gu mì-fhortanach chan eil ticead agam. Chunnaic mi Motörhead bliadhnaichean air ais (1998?) 's bha iad fìor mhath. Tha mi an dòchas gum faic mi iad a-rithist san àm ri teachd ach cha bhi cothrom agam am bliadhna :-(

A' blogachadh gu slaodach

2005-10-29T20:30:00.000+01:00

Feasgar math a leughadairean!

Chunnaic mi an diugh nach do chuir mi ach dà theachdaireachd air a' bhlog seo am mìos. Bha fios agam nach robh mi air a bhith a' blogachadh cho tric am mìos ach bha mi den bheachd gun d'rinn mi na b'fheàrr na dà theachdaireachd a-mhàin. Chan eil sin math idir agus chan eil fios agam carson nach do sgrìobh mi tuilleadh gu ruige seo. Bha mi beagan na bu trainge am mìos, ach cha robh mi cho trang nach robh cothrom agam a bhith a' sgrìobhadh rudeigin an seo.

'S àbhaist dhomh an stuth seo a sgrìobhadh ann an leabhar agus, an déidh sin, clò-sgrìobhaidh mi an seo e. Bha mi a' coimhead san leabhar latha no dhà air ais agus tha trì no ceithir "aistidhean" ann. Gu mì-fhortanach chan eil iad deiseil fhathast. Tha mi an dòchas gum bi mi a' dèanamh nas fheàrr an ath-mhìos. :-)

Blog diofaraichte

2005-10-15T22:08:00.000+01:00

Tha saoghal nam blogaichean Gàidhlig a' fàs gu luath an dràsda, ach chunnaic mi blog ùr an diugh. Chan eil e sa' Ghàidhlig, ach sa' Chòrnais! Chan urrainn dhomh a leughadh oir chan eil Còrnais agam (uill, chan eil fhathast!) ach chan fhaca mi a leithid gu ruige seo. An e a' chiad bhlog sa' Chòrnais? Tha mi a' smaoineachadh gu bheil. Ach co-dhiù, ma tha ùidh agaibh anns a' chànain seo, 's urrainn dhuibh am blog fhaicinn aig Nebes Geryow Kernewek.

A' fàs nas fhuaire

2005-10-02T18:27:00.000+01:00

Tha na h-oidhcheannan a' fàs nas fhada a-nis nuair a tha sinn san Dàmhair. Tha e gu bhith leth-uair an déidh sia feasgar an dràsda agus tha e gu math dorcha cheana. Chan eil na reultan ri fhaicinn fhathast ach tha na solais-sràid' air.

Bha mi shìos aig an taigh-seinnse a-raoir agus bha mi a' mothachadh na fuachd. Tha an taigh-seinnse aig an stéisean-trèanaichean agus 's àbhaist dhuinn a bhith a-muigh air an àrd-chabhsair, gu h-àiridh nuair a bhios e trang a-staigh. Chan e ach taigh-seinnse beag a th'ann. As t-Samhradh tha e math a bhith air an taobh a-muigh -- 's urrainn dhuinn a bhith nar suidhe air na bùird-phicnic a' coimhead air na daoine a tha a' dol seachad air na trèanaichean. Cha bhiodh sibh a' creidsinn dé thachras bho àm gu àm!

Co-dhiù, mu dheich uairean a-raoir, bha sinn a-muigh fhathast ach thòisich a' ghaoth a shèideadh dìreach sìos an àrd-chabhsair. Dh'fhuirich sinn a-muigh gus an leth-uair ach an uair sin rinn sinn air an teas a-steach. Chaidh innse dhomh gum bi i nas blàithe a-rithist an t-seachdain tighinn, ach chan eil mi cinnteach. Gu dearbh, bha i fuar nuair a bha mi a' coiseachd dhachaigh a-raoir 's bha beagan reothaidh air a' chàr agam sa' mhadainn an diugh. Tha am Foghar a' tighinn!

Spùinneadairean-mara air fàire!

2005-09-30T16:25:00.000+01:00

Tha mi 'n dòchas nach do chuir mi an t-eagal oirbh leis an dealbh seo! Ach...

Bha mi a' sealltainn air an làrach-lìn aig ebay an t-seachdain seo chaidh agus chunnaic mi duine a bha a' reic brataichean. Bha brataichean de gach seòrsa aige, ach b'fheàrr leam an té seo. Mar sin, cheannaich mi i agus ràinig i an taigh agam latha no dhà air ais. Tha a' bhratach math fhéin! Ach gu mì-fhortanach chan eil fhios agam idir dé a nì mi leatha, ach tha mi den bheachd gum bi i feumail san àm ri teachd...

Bi faiceallach ma bhios sibh a' seòladh air canàl faisg air Manchester a dh'aithghearr -- ma dh'fhaoidte gum bi mi ann an àite-falaich faisg air làimh leis a' bhrataich ùir agam! Leumaidh mi a-mach agus goididh mi am bàta 's na buinn-a-h-ochd agaibh!

A-nis, càit' a bheil mo ghrog? Io ho ho!

Gaelcast 2

2005-09-24T20:43:00.000+01:00

Fhuair mi teachdaireachd bho Liam aig Gaelcast an dé! 'S e rud feumail a th'ann am blogsearch bho Ghoogle, nach e? Mar sin, sgrìobhaidh mi beagan mur deidhinn a-rithist.

Dh'éisd mi ris na prògraman a rinn iad 's bha e glé inntinneach. Anns a' chiad prògram bha iad a' bruidhinn ri daoine aig a' chiad Mhòd sna Stàitean Aonaichte agus ri Coinneach MacIomhair (bho Radio nan Gaidheal). Bha Coinneach a' bruidhinn beagan ro luath 's cha do thuig mi móran. Éisdidh mi a-rithist ge-tà agus 's dòcha gum bi e nas fhasa a bhith ga thuigsinn. Ach, mar a tha fios agaibh, chan e ach neach-ionnsachaidh an th'annam. Mar sin, mas e neach-ionnsachaidh a th'annad cuideachd, tha mi den bheachd gum bi na "podcastan" feumail dhut. Bu chòir dhuinn éisdeachd ri Gàidhlig nàdarra cho tric 's a ghabhas agus tha mi cinnteach gum bi na prògraman seo gar cuideachadh. Mholainn na prògraman gu dearbh -- gu h-àraidh am pìos mu dheidhinn am "piper-sniper"... :-)

Na h-Òganaich

2005-09-22T20:22:00.000+01:00

Tha Manchester a' fàs nas trainge a-rithist an dràsda. Tha na h-òganaich (no "juveniles" mar a chanas sinn) a' tighinn air ais dhan oilthigh 's tha iad a' coimhead nas òige na bha iad a-riamh. Mar as àbhaist san t-Sultain, tha mi a' faireachdainn aosda...

Bha mi ann am meadhan a' bhaile Dimàirt, a' coiseachd sìos Sràid a' Mhargaidh 's bha e fada ro thrang. Gu dearbh, bithidh Sràid a' Mhargaidh ro thrang gach latha, ach aig an uair sin bha e uamhasach dona. Bha a h-uile duine a' dol a-null 's a-nall gun smaoin 'son duine sam bith eile.

Aig an oilthigh fhéin, chan eil e cho sàmhach a-nis. Tha na h-òganaich a' coiseachd gu trom tro na trannsaichean ach théid iad dhachaigh mu shia uairean, an déidh sin tha e nas fheàrr a-rithist. (Cha bhi mi ann sna maidnean na làithean seo.)

Chan eil mi cinnteach fhathast ma bhios mi a' teagasg beagan mu dheidhinn automata 's innealan Turing, ach 's dòcha gum bi mi ga dhèanamh a-rithist am bliadhna. Chan eil e ro dhona ('s chan eil e doirbh) ach théid am fiosrachadh a-steach tro aon chluas agus a-mach tron chluais eile -- dìreach mar a rinn e aig an àm ud nuair a bha mi nam fho-cheumnaiche! Ah uill, "lath' eile 's dolar eile" mar a chanas iad...

Sgìth a-rithist

2005-09-17T21:01:00.000+01:00

Bha mi cho sgìth ri cù an dé. No, 's dòcha, ri seann chù-chaorach a bha a' ruith suas 's sìos nam beann fad an latha. Uill, beagan mar sin. Chaidh mi dhan leabaidh mu ochd uairean feasgar! Ochd uairean air Dihaoine! Chan eil sin gnàthach idir. Dhùisg mi mu mheadhan oidhche 's chaidh mi sìos an staidhre. Bha e cho sàmhach. Leugh mi beagan air SG ach an uair sin bha mo shùilean a' dùnadh a-rithist 's chaidh mi air ais dhan leabaidh...

An diugh tha mi a' faireachdainn fada nas fheàrr. Tha Siorrachd Iorc a' cluich an aghaidh Siorrachd Darbaidh agus bu chòir dhaibh buannachadh. Chan eil an Saoghal cho dona an diugh -- cha robh mi san taigh-seinnse o chionn Diluain (an déidh na criogaid!) ach saoilidh mi gum bi mi ann a-nochd.

Gaelcast

2005-09-14T18:51:00.000+01:00

Am faca sibh Gaelcast? Chan eil móran ann fhathast, ach bidh iad a' dèanamh podcasts (mar a chanas iad) sa' Ghàidhlig. Chan eil ach a' chiad phodcast ann an dràsda, ach tha iad ag ràdh gum bi móran a' tighinn a dh'aithghearr. Ma bha sibh air SG aig àm sam bith, 's dòcha gu bheil sibh eòlach air aon fhear san sgioba Gaelcast...

Abair criogaid!

2005-09-12T17:31:00.000+01:00

Tha an Luaithre againn a-rithist!

Dàn mu dheidhinn tàirneanaich

2005-09-11T13:51:00.000+01:00

An t-seachdain seo chaidh, nuair a bha an tàirneanach 's an dealanach ann, chuimhnich mi air dàn bhon leabhar Caoran ann an Cliabh le Mairead Hulse. Cheannaich mi an leabhar o chionn móran bhliadhnaichean o bhùth san Ath Leathann san Eilean Sgitheanach. 'S e Craft Encounters a bha an t-ainm a bha air a' bhùth 's bha i a' reic leabhraichean, dealbhan, crèadhadaireachd, ceòl, snaighidhean beaga 's ceàirdean eile. Bha oifis a' phuist ann aig an àm sin cuideachd. Saoilidh mi gu bheil am bùth ann fhathast, ach chan eil fhios agam cionnas a tha i a' dèanamh an dràsda. Ach 's e bùth mhath a bh'innte nuair a bha mi ann.

Co-dhiù, seo an dàn:
Cluinn an tàrnaich,
Cluinn an tàrnaich,
Éisd, éisd, éisd!
Éisd, éisd, éisd!
Seo an t-uisge tighinn,
Seo an t-uisge tighinn,
Bithidh sinn fliuch!
Bithidh sinn fliuch!
Bidh an dàn a' còrdadh ribh nas motha ma sheinneas sibh air an fhonn Frère Jacques e! Math fhéin -- abair duanag!

Chan eil móran

2005-09-05T19:46:00.000+01:00

Chan eil m'eanchainn ag obair an diugh. Tha mi nam shuidhe san oifis agam, ach chan eil mi a' dèanamh dad, uill, dad feumail co-dhiù. Tha an cadal orm a dh'aindeoin 's gu bheil mi air pailteas cofaidh òl. Bha mi a' feuchainn ris an tòimhseachan-tarsainn san Sùil Phrìobhaideach a dhèanamh ach tha mi ro ghòrach an dràsda. Fhuair mi mu dheich freagairtean ach an uair sin sguir mi. 'S dòcha gum bi mi a' feuchainn ris nas anmoiche.

Mar as àbhaist, bidh mi a' dol dhan taigh-seinnse a-nochd a chionn 's gum bi an ceasnachadh ann. Chan eil mi cinnteach ma bhios e math -- bidh J (an DJ a bha a' cur ceistean thugam mu dheidhinn tòimhseachain-tarsainn) a' dèanamh nan ceistean agus bidh N (amadan a' bhaile) a' dèanamh nan dealbhan. Thuirt J gum bi 50 ceistean ann 's na h-uile mu dheidhinn ciùil... Ah uill, c'est la vie.

Fhuair mi an CD ùr le Khanate bho Amazon an diugh 's mi dìreach air éisdeachd ris. Mar as àbhaist tha e chooo slaodach 's tha Alan Dubin (an "seinneadair") a' sgreuchail mar mhuncaidh leis a chlachan ann an teanchair! Cha bhi Khanate a' cluich ceòl àghmhor sona. :-)

Abair latha!

2005-09-01T18:58:00.000+01:00

Uill, 's e an t-Sultain an th'innte a-nis, ach tha i caran ro theth dhomh fhathast. Ach abair latha a bh'ann an dé -- bha an teochachd 28°C nuair a bha mi a' coiseachd dhan bhaile feasgar. Bha agam ri dhol dhan oifis a' phuist airson parsail oir cha robh mi aig an taigh agam nuair a thàinig am post Dimàirt.

Bha mi air ais aig an taigh mu thrì uairean 's bha a' ghrain a' deàrrsadh, ach mu cheithir uairean fhàs e glé dhorcha. Chuir mi an solas air 's an uair sin thàinig an t-uisge. Bha e bog fliuch 's abhainn a' ruith sìos an rathad. Beagan an déidh sin, bha tàirneanach 's dealanach ann cuideachd! 'S toigh leam aimsir mar sin gu mór -- nuair a tha na diathan a' sabaid ri chéile!

Co-dhiù, mionaid no dhà an déidh sin, chaidh an dealain 's mi nam shuidhe sa chathair agam leam fhìn san dorchadas fhad 's a bha cogadh sna speuran os mo chionn! Las mi coinneal 's chaidh mi dhan leabaidh far an do leugh mi beagan bhon leabhar "Eagal san dorchadas" a cheannaich mi bho Chomhairle nan Leabhraichean 's a bha sa pharsail...

Abair latha!

Làithean 's mìosan

2005-08-20T21:18:00.000+01:00

Uill, tha an sgriobt an seo mu dheireadh thall! Ma tha thu ga iarraidh, faigh e bhon cheangal faisg air a' bhonn --->

Tha an sgriobt saor an asgaidh ach, ma tha thu ga chleachdadh air a' bhlog agad agus ma tha ùine agad, bu mhath leam cluinntinn bhuat -- an uair sin 's urrainn dhomh an sgriobt ag obair ann an àiteachan eile fhaicinn agus am blog agad a leughadh! ("Postcardware", mar a chanas iad!)

Ma tha mi fortanach, cha bhi mi a' sgrìobhadh tuilleadh sam bith mu dheidhinn javascript a-rithist a dh'aithghearr!

Spam!

2005-08-19T19:51:00.000+01:00

Chunnaic mi a' chiad phìos spam air a' bhlog seo an diugh. Bha an spam bho dhuine leis an ainm "Mike Price" air 's bha e a' bruidhinn air craobhan! Bha móran ri ràdh aige ach cha do leugh mi a' mhórchuid den fhaclan aige. 'S toigh leam craobhan, ach cha toigh leam spam mun deidhinn idir.

Ach, tha seòl-obrachaidh ùr againn air Blogger anns a' chogadh an aghaidh nan luchd-spamaidh. Tha Blogger a' dèanamh "aithneachadh facail" a-nis (ma tha thu ga iarraidh) mus urrainn do leughadairean beachdan fhàgail. 'S math sin! Tha mi 'n dòchas nach bi spam ann an seo a-rithist a-chaoidh, ach chan eil mi cho faoin...

Rannsachadh aig Blogger

2005-08-11T20:12:00.000+01:00

Tha Blogger a' rannsachadh dé tha sinn ag iarraidh bhuapa. Tha ceangal ann air an "dashboard" agad airson an rannsachaidh -- lean e agus can thuca gum bu chòir dhaibh móran taice a thoirt do chainntean beaga mar Ghàidhlig. (Uill, chan eil Gàidhlig beag, ach tha fhios agad dé tha mi a' ciallachadh.)

Tha mi den bheachd nach bi iad gar éisdeachd, ach mura bheil sinn a' feuchainn...

Johnny Cash agus a' chriogaid

2005-08-05T16:23:00.000+01:00

Chan eil mi air a bhith a' blogachadh cho tric o chionn ghoirid, oir bha mi ro thrang. Uill, chan eil sin dìreach ceart, "trang a' dèanamh neoni", mar a chanas iad. Tha am fiabhras-feòir orm a-rithist an t-seachdain seo, mar sin chan eil mi cho sunndach 's a bhios mi mar as trice. Grrr.

Fhuair mi an CD Laoidheadair mo mhàthar le Johnny Cash an t-seachdain seo chaidh. 'S e an CD mu dheireadh a do chlàraich e mus do bhàisich e a th'ann. Fhuair mi seo, nuair a bha mi san t-Siorrachd Iorc, oir bha e tiodhlac bho O airson an co-là-breith agam. Bha mi ag éisdeachd ris an CD seo anns a' chàr nuair a bha mi a' dràibheadh air ais gu Manchester 's bha e uamhasach ràsanach! Nis, cha robh e dona -- bha na h-òrain cho ionraic, cho simplidh, cho cudthromach dhasan, ach chan eil e a' còrdadh rium. 'S fheàrr leam rudeigin nas beothaile.

An diugh tha mi ag éisdeachd ris a' chriogaid air an réidio. Tha Sasainn a' cluich glé mhath :-) Tha mi 'n dòchas gum bi iad a' cluich gu math a-màireach 's Didòmhnaich cuideachd. Tha mi a' smaoineachadh nach bi iad a' cluich fhathast Diluain! Tha Sasainn 99 ruithean air thoiseach air nan Astràilianach letheach-slighe tron gheama!

Iomraiteach sa' Chuimrigh 2

2005-08-05T16:10:00.000+01:00

Thàinig mo charaid (duine às a' Chuimrigh) air ais bhon Fhraing an t-seachdain seo, 's dh'innis e dhomh dé bha iad ag ràdh mu mo dheidhinn sa' chruinne-bhlogaichean Cuimreach. Chan eadar-theangaich mi na beachdan, ach bha iad math.

Litrichean Ruairidh

2005-07-20T18:27:00.000+01:00

Leugh mi ceithir den Litrichean do Luchd-Ionnsachaidh le Ruairidh MacIlleathain bhon BhBC a-raoir 's bha iad a' còrdadh rium gu mór -- gu h-àiridh an litir mu dheidhinn a' phoca-salainn. Chlò-bhuail mi a' chiad dheich dhiubh o chionn mìosa (no dhà?) ach cha robh àm agam air an son a leughadh. Bu chòir dhomh a bhith air eadhon aon a leughadh, ach cha d'rinn mi.

Uill, ghabh mi iongantas oir bha mi a' smaoineachadh gum biodh iad nas doirbhe na bha iad. Gu dearbh bha am faclair agam ri mo thaobh, ach b'urrainn dhomh móran a leughadh gun e. Saoilidh mi gum bi duilgheadasan orm a dh'aithghearr le litrichean eile, ach bha deagh shunnd orm a-raoir :-)

Mar sin, ma tha thu ag ionnsachadh Gàidhlig, bu chòir dhut móran nan litrichean seo a leughadh gun dàil -- bithidh mi!

Iomraiteach sa' Chuimrigh

2005-07-19T17:03:00.000+01:00

Uill, sgrìobh Rhys thugam a-rithist an dé. Thuirt e gu bheil iad a' bruidhinn ormsa anns a' chruinne-bhlogaichean Chuimreach! Bha Rhys air dà phuist fhaicinn mu dheidhinn na javascript a dh'eadar-theangaich mi bho Chuimris gu Gàidhlig o chionn ghoirid. Chan eil fhios agam fhathast dé tha iad ag ràdh, ach 's urrainn dhut na puist fhaicinn an seo agus an seo. Ma chì mi mo charaid an diugh (aon a tha às a' Chuimrigh), bithidh e ag eadar-theangachadh na puist seo gu Beurla. An uair sin, sgrìobhaidh mi eadar-theangachadh eile an seo...

Cha tuirt mi seo fhathast, ach feumaidh mi cur móran taing gu Sbwriel 's Rhys airson a' chòd sa' Chuimris -- gun sin bhiodh a' Bheurla ann fhathast agus cha bhiodh sin a' còrdadh rium idir! Tapadh leibh a bhalacha! :-)

Latha leisg

2005-07-16T23:53:00.000+01:00

Cha d'rinn mi dad sam bith an diugh -- bha e dìreach sgoinneil!

Teas agus tuilleadh javascript

2005-07-11T23:20:00.000+01:00

Bha an aimsir ro theth a-rithist an diugh. Bha mi nam chadal fad na maidne agus, nuair a dhùisg mi, cha robh mi sona. Nigh mi, chuir mi m'aodach orm 's dh'fhàg mi an taigh. Obh! Bha i nas teotha a-muigh! Dh'fhosgail mi dorus a' chàir agus obh obh! -- bha e fada nas teotha a-staigh! Thuirt an teas-mheidh 29°C ach bha sin a-muigh -- saoilidh mi gun robh e gu bhith 300°C sa' chàr fhéin. Chuir sìos mi na h-uinneagan 's dhraibh mi chun Manchester gu luath!

Nuair a ràining mi Manchester, chaidh mi dhan oifis agam far nach robh e cho teth. Mar sin dh'obraich mi air pìos eile javascript airson nan làithean 's nam mìosan air a' bhlog san Laidinn agam. Bha an javascript seo fada nas doirbhe na'm còd a tha ann air a' bhlog seo -- bha na Ròmananaich craicte! Sgrìobhadh iad "ante diem V Idus Iulias MMDCCLVIII ab urbe condita" airson an diugh. Chan eil sin ciallach idir! Co-dhiù, ma tha ùidh agad, bidh an javascript ag obair air a' bhlog ud a dh'aithghearr. ('S dòcha a-màireach.)

Bleurgh

2005-07-06T17:24:00.000+01:00

Dh'òl mi cus leann a-raoir, mar sin chan eil mi gu math an diugh. Tha mi airson a bhith nam chadal, ach feumaidh mi a dhol do chuirm-chiùil a-nochd. Dh'ith mi droch churry (choiridh?) aig meadhan-latha cuideachd agus chan eil sin gam chuideachadh a bharrachd. Ah uill.

Tha mi a' gabhail cofaidh eile a-nis -- chì sinn ma tha mi a' faireachdainn nas fheàrr an dèidh sin...

An t-sìde an diugh agus Molesworth

2005-07-04T17:54:00.000+01:00

Tha an t-uisge ann a-rithist an diugh agus tha mi glé shunndach oir chan eil i cho teth 's a bha i an seachdain seo chaidh. Am feasgar seo tha mi ag òl cofaidh agus a' leughadh Molesworth a-rithist. 'S toigh leam an leabhar gu mór cheers cheers cheers.

Bidh an fharpaischeist ann, mar as àbhaist, aig an taigh-seinnse a nochd ach tha mi a' smaoineachadh nach bi mi ga dèanamh -- tha i ro ràsanach na làithean seo chiz. 'S dòcha gum bi mi a' dol ann airson pinnt no dhà agus airson "barracking" a dhèanamh, ach cha bhi mi a' freagairt nam ceistean.

Criogaid Natwest

2005-07-02T23:35:00.000+01:00

Abair criogaid ann an Lunnainn an diugh! Dh'éisd mi rithe air an réidio 's bha i dìreach sgoinneil. (Cha robh mi ag éisdeachd ris a' chonsairt "8 Beò" idir -- tha a' chriogaid fada nas fheàrr, nach eil?)

A-nochd dh'ith mi aig a' Mhongolian Barbeque ann am Manchester. Tha am biadh glé mhath anns an taigh-bìdh sin agus tha mi airson a dhol air ais a dh'aithghearr :-)

Co-dhiù, gabhaidh mi té mhór a-nis, an uair sin théid mi dhan leabaidh agam. Oidhche mhath.

Beagan javascript

2005-07-01T15:42:00.000+01:00

Chuir mi beagan javascript air a' bhlog seo an diugh. Tha mi'n dòchas gun urrainn dhuibh na làithean 's na mìosan fhaicinn sa' Ghàidhlig a-nis :-)

Blog ùr eile

2005-06-30T01:52:00.000+01:00

Sgrìobh Jessica thugam an-dé -- tha i sa' Ghearmailt 's tha blog Gàidhlig aice! Tha an cruinne-bhlogaichean Gàidhlig a' fàs gach latha agus tha sin a' còrdadh rium gu mór :-)

Post-d gu blogger 3

2005-06-23T16:42:00.000+01:00

Sgrìobh mi thuca a-rithist Diciadan sa chaidh ach a-nis tha mi a' smaoineachadh nach eil iad gam éisdeachd. Cha do sgrìobh iad dad sam bith thugam fhathast, mar sin saoilidh mi gum bi sinn gun taic bhuapa. 'S bochd.

Fhuair mi pìos còd ann an javascript bho Rhys sa' Chuimrigh a dh'atharraicheas na làithean 's na mìosan air blog gu Cuimris. Saoilidh mi gun urrainn dhomh e atharrachadh agus mar sin bi iad sa' Ghàidhlig.

Rannsachadh aig MIT

2005-06-23T16:31:00.000+01:00

Rinn mi sin an diugh: 'S e rannsachadh mu dheidhinn bhlogaichean a th'ann agus tha e gu math inntinneach.

Molesworth

2005-06-23T16:08:00.000+01:00

Fhuair mi an leabhar Molesworth le Geoffrey Willans 's Ronald Searle an diugh bho Amazon. Dh'innis Camha dhomh mu a dheidhinn air SG. 'S toigh leam na dealbhan 's mi an dòchas gum bi na faclan math cuideachd... bu chòir dhomh a bhith ag obair an dràsda, ach saolidh mi gun nì mi cofaidh 's leughaidh an leabhar. Tha i ro theth co-dhiù.

Fichead20

2005-06-12T18:34:00.000+01:00

Tha an t-uisge ann an diugh, ach tha mi 'n dòchas nach bi e ann a-màireach. 'S toigh leam an t-uisge, ach bidh an t-Sasainn a' cluich criogaid an aghaidh nan Astràilianach aig an Rose Bowl ann an Hampshire. Saoilidh mi gum bi e math agus tha mi 'n dòchas gun urrainn dhomh e a choimhead air an TBh. Chan eil TBh agam ach, ma bhios mi fortanach, théid mi gun taigh A airson tha TBh ('s leann) aice!

Post-d gu Blogger 2

2005-06-12T18:07:00.000+01:00

Ma tha ùidh agad, cha chuala mi dad sam bith bhuapa fhathast. Sgrìobhaidh mi a-rithist thuca Diciadan, mura bheil mi air rudeigin bhuapa a chluinntinn.

Blog ùr

2005-06-11T20:40:00.000+01:00

Thòisich mi blog eile Diardaoin. Tha an t-ainm "Cogitata sapientia e Somniculoso" air, dìreach mar a tha e air a' bhlog seo! Feumaidh mi dad mu dheidhinn an ainme air a' bhlog seo a sgrìobhadh...

Co-dhiù, bha mi a' bruidhinn ri Mulus agus smaoinich sinn gum bu chòir dhuinn blogaichean a sgrìobhadh sa' Laidinn. Bha sinn ag ionnsachadh Laideann le chéile o chionn 2003 ach am bliadhna cha robh sinn a' dèanamh dad sam bith leatha. Chan eil mi airson i a dhìochuimhneachadh, ach chan eil fhios agam ma bhios àm gu leòr agam airson trì blogaichean a sgrìobhadh... Chì sinn!

Post-d gu Blogger

2005-06-05T11:05:00.000+01:00

Sgrìobh mi gu Blogger an-dé agus chuir mi ceist orra mu dheidhinn Gàidhlig air na blogaichean. Thuirt mi gum bi e glé mhath mas urrainn dhuinn na làithean 's na mìosan sa' Ghàidhlig a chur air na blogaichean againn. Chan eil freagairt agam fhathast, ach tha mi 'n dòchas gum bi iad ag aontachadh leam.

Faic an seo cuideachd (sa' Bheurla).

Tha mi air na faclan Beurla fhògradh!

2005-06-02T19:58:00.000+01:00

Chan eil rud sam bith anns a' Bheurla idir an seo a-nis -- Ho-rò!

Chan eil mi glé thoilichte leis a' bhogsa "Mu mo dheidhinn". Togaidh mi fear nas fheàrr a dh'aithghearr, ach nì seo an gnothach an dràsda.

Cuir tuilleadh Gàidhlig air na blogaichean!

2005-06-02T16:47:00.000+01:00

Rabhadh: Leugh an seo!

O chionn ghoirid bha mi a' bruidhinn ri Graisg a-rithist mu dheidhinn nam blogaichean Gàidhlig. Thuirt mi gum bu chòir dha tuilleadh Gàidhlig a chur air a' bhlog aige!

Co-dhiù, fon phost seo, chì thu "sgrìobhte le..." 's "beachdan" an àite "posted by..." 's "comments" mar a bha e gu tùsail. Dh'innis mi do Ghraisg ciamar as urrainn dha na faclan seo atharrachadh agus a-nis, innisidh mi seo dhut cuideachd :-)

Rabhadh: 'S dòcha nach bi an "template" agad dìreach mar seo, ach, ma tha sinn fortanach, chì thu dé bu chòir dhut dèanamh. Ma nach eil thu cinnteach -- bi faiceallach!

Anns an template agad, eadar  is , lorg pìos còd a tha ag ràdh

<p class="post-footer">
<em>posted by<$BlogItemAuthorNickname$> @ <a href="<$BlogItemPermalinkUrl$>" title="permanent link"><$BlogItemDateTime$></a></em> <BlogItemCommentsEnabled> <a class="comment-link" href="<$BlogItemCommentCreate$>" <$BlogItemCommentFormOnclick$>><$BlogItemCommentCount$> Comments</a> </BlogItemCommentsEnabled> <$BlogItemControl$>
</p>

agus deannan loidhneachan an déidh sin (agus an déidh )

<h4><$BlogItemCommentCount$> Comments:</h4>

agus beagan an déidh sin

<dt class="comment-data" id="c<$BlogCommentNumber$>"><a name="c<$BlogCommentNumber$>"></a>
At <a href="#c<$BlogCommentNumber$>" title="comment permalink"><$BlogCommentDateTime$></a>,
<$BlogCommentAuthor$> said...
</dt>

(tha iad gu math faisg air a' bhun) agus atharraich na faclan gorm. Cùm na h-atharrachaidhean agus ath-fhoillsich am blog iomlan.

Dèanta!

Cuideachd, ann an "Settings > Formatting" is urrainn dhut na làithean, na mìosan 's mar sin air adhart atharrachadh gu àireamhan, ma thogras tu.

Tha fios agam mu dheidhinn ruid eile no dhà as urrainn dhut a dhèanamh, ach saoilidh mi gum bi seo gu leòr leat an diugh. 'S dòcha gum bi mi a' sgrìobhadh tuilleadh a-màireach no a dh'aithghearr.

Tha mi 'n dòchas gur urrainn dhut a thuigsinn dé tha mi ag ràdh agus gun robh seo feumail dhut.

Ro theth

2005-05-27T19:50:00.000+01:00

Bha i ro theth an seo ann am Manchester an diugh. B'ann mu 23°C a bh'ann an teodhachd, ach bha sinn fortanach -- ràinig i mu 32°C ann an Lunnainn! Cha toigh leam an aimsir theth idir. Ma bhios an teodhachd mar sin an seo as t-Samhradh, bidh mi a' leaghadh... cha bhi sin math.

Tha mi a' dol a Leeds Diluain airson na criogaid (Siorrachd Iorc an aghaidh nan Albannach!) -- tha mi 'n dòchas nach bi i cho teth.

Bloglines 's biatach na brìgh

2005-05-27T17:56:00.000+01:00

Saoilidh mi gu bheil biatach na brìgh ag obair gu math às an seo agus às a' bhlog eile agam, ach chan eil Bloglines ag obair gu ceart. Chan eil e ag ùrachadh tric gu leòr.

Dé ur beachdan mu dheidhinn "biatach na brìgh" airson "site feed"? A bheil e ceart gu leòr, no beagan gòrach? Ma tha sibh a' smaoineachadh gu bheil e gòrach, dé mu dheidhinn "craoladh / solaraiche / sgaoileadh na làraich" no rudeigin eile?

Dé theireadh sibh?

Latha trang

2005-05-22T18:17:00.000+01:00

Dh'éirich mi tràth an diugh, uill, aig mu naoi uairean -- 's e Didòmhnaich a th'ann -- oir bha mi a' dol dhan taigh-dhealbh. Cha toigh leam a dhol an sin nuair a tha e ro thrang, mar sin choinnich mi ri L ro aon uair deug agus chaidh sinn ann. Choimhead sinn air Cogaidhean nan Rionnagan 3 's bha e glé mhath. Cha robh mi cinnteach ma bhiodh e math, ach bha mi air na filmichean eile a choimhead agus mar sin, bha mi airson seo a choimhead cuideachd. Bha e a' còrdadh ruim 's bha mi a' gàireachdaich gu tric. 'S toigh leam Ioda! Cha sgrìobh mi rud sam bith eile mu dheidhinn an fhilm air eagal gu bheil thu ag iarraidh a choimhead.

An dèidh an fhilm, dh'ith sinn lòn anns am "Poncy Wine Bar". Tha an t-ainm Seòmar-searraidh Sasannach air, ach 's e poncy wine bar a th'ann... Co-dhiù, an uair sin chaidh sinn do Chlachan-uisge oir bha L airson leabhair mu dheidhinn Florence (anns an Eadailt) a cheannach agus bha mi airson cofaidh -- tha mi ag iarraidh cofaidh daonnan.

A-nis, tha mi anns an oifis agam. Bu chòir dhomh a bhith ag obair, ach 's fheàrr leam a bhith a' sgrìobhadh air am blog agam...

Anns an t-seòmar-craic

2005-05-20T12:01:00.000+01:00

Bha mi a' bruidhinn ri Sanne 's Ciorstaidh bho ShG anns an t-seòmar-craic air oidhche Chiadan. Bha e math. Cha do bhruidhinn sinn móran anns a' Ghàidhlig, ach b'e sin a' chiad àm a bha sinn ann. Tha mi 'n dòchas gum bi sinn a' bruidhinn Gàidhlig gu leòr, comhla ri càch o ShG, anns an t-seòmar a dh'aithghearr.

An duine ràsanach 2

2005-05-20T11:23:00.000+01:00

Bha e air chéilidh orm a-rithist a-raoir. Chan eil an seo, ach air Sgàilean-sùla Troma -- am blog eile agam a tha mi a' sgrìobhadh anns a' Bheurla. Chuir e ceist orm mu dheidhinn litreachadh ainm a' bhluig seo. Bha e a' smaoineachadh gun robh mi ceàrr. (Tha an litreachadh ceart, nach eil?) Co-dhiù, dhubh mi a-mach a bheachd, ach chan eil mi a' tuigsinn dà rudan. Ma nach eil a' Ghàidhlig buntainneach an diugh (mar a chanas e), carson a bha e a' leughadh nam blogaichean seo? Agus, carson a bha e a' leughadh iad nuair nach urrainn dha iad a thuigsinn?!

'S e call a th'ann, ach tha mi a' smaoineachadh gur dòcha gur e fear bhon thaigh-seinnse ionadail far an òl mi o àm gu àm a th'anns an duine ràsanach. Bha mi a' bruidhinn ris mu dheidhinn bhlogaichean Gàidhlig sa' Ghiblean. Chan eil mi cinnteach ach, ma tha mi ceart, 's urrainn dhomh innse dhuibh gu bheil an t-ainm air iomchaidh!

Ma tha sinn fortanach, cha bhi e a' tighinn air ais a-rithist.

Sudoku

2005-05-16T22:49:00.000+01:00

Dé am feum a th'ann an Sudoku? Rinn mi aon an diugh ach cha robh e inntinneach idir. Nì mi tòimhseachan-tarsainn gu tric 's saoilidh mi gu bheil iad fada nas fheàrr na Sudoku. Dé do bheachd?

Blog eile agam

2005-05-16T21:34:00.000+01:00

Thòisich mi blog eile an diugh. Tha an t-ainm "Heavy Eyelids" air agus bidh mi a' sgrìobhadh an sin anns a' Bheurla bho àm gu àm. Ma tha ùidh agaibh, lean an ceangal...

Dihaoine 13mh

2005-05-13T20:51:00.000+01:00

Dh'fhuireach mi nam leabaidh an-diugh, ach tha mi a' dol dhan taigh-seinnse a dh'aighthearr -- 's e Dihaoine a th'ann! Sgrìobhaidh mi móran nas anmoiche no a-màireach -- bha mi glé thrang an t-seachdain seo (ach chan eil an-diugh).

Habemus senatorem primum

2005-05-06T17:17:00.000+01:00

Ach chan e iongantas mór a th'ann...

Dé tha "Chip and PIN" anns a' Ghàidhlig?

2005-05-04T16:27:00.000+01:00

Cha robh mi a' sgrìobhadh dad an-seo o chionn ghoirid oir cha robh mi gu math. Bha an cnatan orm 's bha mo cheann goirt cuideachd, ach 's e rud gasda a th'ann am paracetamol agus tha mi a' faireachdainn nas fheàrr a-rithist a-nis.

Co-dhiù, a chionn gun robh mi tinn, cha robh móran bìdh anns an taigh agam an-dé. Mar sin, chaidh mi a Thesco mu dheich uairean a-raoir. 'S fheàrr leam a bhith ann an Tesco nas anmoiche air an fheasgar oir chan eil e cho trang an uairsin.

Thagh mi na rudan a bha mi ag iarraidh agus chaidh mi chun an àite pàighidh. A chionn gur e anam dàna a th'annam, chaidh mi dhan àite fhìn-fhritheilteach. Bha e a' dol gu math agus bha na bagaichean làn. An uairsin, chuir mi a' chairt agam tron inneal agus bha an gnothach dèanta! Cha do sgrìobh mi m'ainm air rud sam bith agus cha do dh'ùisnich mi mo PhIN na bu mhotha!

Dé am feum a th'anns an tèarainteachd ùr? An ath uair a tha mi anns a' bhùth, nì mi cairt de chuideigin eile!

An duine ràsanach

2005-04-29T16:52:00.000+01:00

Feasgar math,

Tha a' ghrian a' deàrrsadh ann am Manchester an-diugh agus tha mi sona oir 's e Dihaoine a th'ann. Ach...

Nuair a bha mi ann nas moiche, bha mi beagan brònach oir chunnaic mi beachd bho dhuine a tha an t-ainm "ràsanach" air. Saoilidh mi nach eil a' Ghàidhlig aige, mar sin chan eil mi a' cleachdadh an ainme Bheurla aige. Co-dhiù, bha e a' sgrìobhadh anns a' Bheurla 's bha e ag ràdh nach eil a' Ghàidhlig buntainneach an-diugh. Chuir mi am beachd aige anns an t-sgoithich-sgudail gun dàil!

Ma tha thu ga fhaicinn, cuir na faclan aige anns an t-soithich-sgudail cuideachd! Chan eil an duine ràsanach seo a dhìth oirnn anns a' chruinne-bhlogaichean.

Sabhal Mór

2005-04-27T20:27:00.000+01:00

Chunnaic mi an-dràsda a tha am blog seo ainmichte air an làrach Sabhail-Mhóir. Bha sin uamhasach luath 's tha mi a' cnuasachadh ciamar a tha fios aca. An robh duine sam bith a' bruidhinn riutha? Chan eil e gu diofar dhomh (ach tha mi toilichte) -- ach bha e cho luath!

Tha sinn a' gluasad air astar ann am blogosphere Gàidhlig an-diugh!

Fàilte a h-uile duine!

2005-04-26T17:45:00.000+01:00

Fàilte gu mo bhlog ùr. Tha mi 'n dòchas gum bi sibh a' tachairt air rud no dhà a tha inntinneach dhuibh.

Chan eil fhios agam fhathast dé bhios mi a' sgrìobhadh an seo, ach chì sinn luaithe no maille!